ചെന്നൈ: ഒക്ടോബര്‍, നവംബര്‍ മാസങ്ങളിലെ ഉത്സവകാലത്ത് മടക്കയാത്രയ്ക്ക് നിരക്കിളവുമായി റെയില്‍വേ. ഒക്ടോബര്‍ 13-നും 26-നുമിടയില്‍ യാത്ര പോകുന്നവര്‍ നവംബര്‍ 17-നും ഡിസംബര്‍ ഒന്നിനുമിടയില്‍ അതേ തീവണ്ടിയില്‍ മടങ്ങിവരികയാണെങ്കില്‍ മടക്ക ടിക്കറ്റിന്റെ നിരക്കില്‍ 20 ശതമാനം ഇളവു ലഭിക്കും.
ഒക്ടോബര്‍ 13-ന് തുടങ്ങുന്ന യാത്രയുടെ ടിക്കറ്റ് ഓഗസ്റ്റ് 14 മുതല്‍ റിസര്‍വ് ചെയ്യാം. നവംബര്‍ 17-ന് തുടങ്ങുന്ന മടക്കയാത്രയുടെ ടിക്കറ്റ് പിന്നീട് റിസര്‍വേഷന്‍ തുടങ്ങുന്ന മുറയ്ക്കാണ് എടുക്കേണ്ടത്. പതിവു വണ്ടികള്‍ക്കും ഉത്സവകാല പ്രത്യേക വണ്ടികള്‍ക്കും ഇളവു ബാധകമാണ്. എന്നാല്‍, തിരക്കിനനുസരിച്ച് ടിക്കറ്റ് ചാര്‍ജ് കൂടുന്ന രാജധാനി, ശതാബ്ദി, തുരന്തോ പോലുള്ള വണ്ടികളില്‍ ഈ ആനുകൂല്യം ലഭിക്കില്ല. രണ്ടു ടിക്കറ്റും കണ്‍ഫേം ആണെങ്കിലേ ഇളവിന് അര്‍ഹതയുള്ളൂ. ഇതോടൊപ്പം മറ്റ് ഇളവുകള്‍ ലഭിക്കില്ല.
നിരക്കിളവ് ഇങ്ങനെ
• ഒരേ യാത്രക്കാര്‍ ഒരേ വണ്ടിക്ക് ടിക്കറ്റും മടക്കടിക്കറ്റുമെടുക്കുമ്പോഴേ ഇളവു ലഭിക്കുകയൂള്ളൂ.
• കയറുകയും ഇറങ്ങുകയും ചെയ്യുന്ന സ്റ്റേഷനുകളിലും മാറ്റമുണ്ടാകാന്‍ പാടില്ല.
• മടക്ക ടിക്കറ്റിന്റെ അടിസ്ഥാന നിരക്കിന്റെ 20 ശതമാനമായിരിക്കും ഇളവ്.
• ഇങ്ങനെയെടുക്കുന്ന ടിക്കറ്റില്‍ പിന്നീട് മാറ്റങ്ങള്‍ അനുവദിക്കില്ല.
• കൗണ്ടറില്‍നിന്നോ ഓണ്‍ലൈന്‍ ആയോ ടിക്കറ്റെടുക്കാം
മുതിര്‍ന്നപൗരര്‍ക്ക് നിരക്കിളവ് പുനഃസ്ഥാപിക്കില്ല
തീവണ്ടിയില്‍ മുതിര്‍ന്നപൗരര്‍ക്കുള്ള നിരക്കിളവ് പുനഃസ്ഥാപിക്കുന്നത് പരിഗണനയിലില്ല. റെയില്‍വേ സ്റ്റാന്‍ഡിങ് കമ്മിറ്റി മുതിര്‍ന്നപൗരര്‍ക്കുള്ള നിരക്കിളവ് പുനഃസ്ഥാപിക്കണമെന്ന് ശുപാര്‍ശ ചെയ്തിട്ടുണ്ട്
-അശ്വിനി വൈഷ്ണവ്, റെയില്‍വേ മന്ത്രി
