തിരുവനന്തപുരം: മന്ത്രിമാരുടെ വകുപ്പുകളിലെ അനിശ്ചിതത്വം തുടരുന്നു. ഇക്കാരണത്താല് ഗസറ്റ് നോട്ടിഫിക്കേഷന് ഇതുവരെ പുറത്തിറക്കാന് സാധിച്ചിട്ടില്ല. ഉന്നതവിദ്യാഭ്യാസം, ഫിഷറീസ്, കൃഷി ഉള്പ്പെടെയുള്ള വകുപ്പുകളിലാണ് അനിശ്ചിതത്വം തുടരുന്നത്.ഉന്നത വിദ്യാഭ്യാസ വകുപ്പ് കോണ്ഗ്രസിന് വിട്ടു നല്കാമെന്ന് മുസ്ലിം ലീഗ് വ്യക്തമാക്കിയെങ്കിലും ഫിഷറീസ് വകുപ്പ് തങ്ങള്ക്ക് വേണമെന്നാണ് ലീഗിന്റെ ആവശ്യം.
എന്നാല് ലത്തീന് സമുദായത്തിന് മന്ത്രിസഭയില് പ്രാതിനിധ്യം കിട്ടിയില്ലെന്ന പരാതി ലത്തീന് സഭ മുഖ്യമന്ത്രിയെ കണ്ട് ധരിപ്പിച്ചിട്ടുണ്ട്. കൂടാതെ ഫിഷറീസ് വകുപ്പ് ലീഗിന് നല്കരുതെന്നും കോണ്ഗ്രസ് കൈകാര്യം ചെയ്യണമെന്നുമാണ് ലത്തീന് സഭ ആവശ്യപ്പെട്ടിരിക്കുന്നത്. കോണ്ഗ്രസിലെ ഒരു വിഭാഗം നേതാക്കള്ക്കും ഇതേ അഭിപ്രായമാണ്.
എന്നാല് ഫിഷറീസ് വകുപ്പ് നല്കിയില്ലെങ്കില് ഉന്നത വിദ്യാഭ്യാസ വകുപ്പ് വിട്ടു നല്കില്ലെന്നാണ് ലീഗിന്റെ കര്ശന നിലപാട്. ഇക്കാരണങ്ങളാലാണ് വകുപ്പ് വിഭജനത്തില് അന്തിമ തീരുമാനം ഉണ്ടാകാന് കാലതാമസം.
വകുപ്പിന്റെ കാര്യത്തില് തര്ക്കമുണ്ടെന്ന് മന്ത്രി കെ.മുരളീധരന് വ്യക്തമാക്കിയിട്ടുണ്ട്. ഉന്നത വിദ്യാഭ്യാസം, ഫിഷറീസ് വകുപ്പുകളിലാണ് തര്ക്കമെന്നും ഇന്ന് തന്നെ പരിഹരിച്ച് ഗസറ്റ് വിജ്ഞാപനം ഉണ്ടാകുമെന്നും അദ്ദേഹം പറഞ്ഞു. ചില മന്ത്രിമാരുടെ വകുപ്പുകളില് പ്രായോഗികമായ മാറ്റങ്ങള് ഉണ്ടാകുമെന്നും അദ്ദേഹം വ്യക്തമാക്കിയിട്ടുണ്ട്.
