കോട്ടയം: നിയമസഭാ തെരഞ്ഞെടുപ്പില് 85 വയസു പിന്നിട്ട മുതിര്ന്ന വോട്ടര്മാര്ക്കും ഭിന്നശേഷി വിഭാഗത്തില്പ്പെട്ടവര്ക്കും വീട്ടിലെത്തി വോട്ടു രേഖപ്പെടുത്തുന്നതിനുള്ള അപേക്ഷാ ഫോം (ഫോം 12 ഡി) വിതരണം തുടങ്ങി. ബിഎല്ഒമാര് വഴിയാണ് വിതരണം. പൂരിപ്പിച്ച അപേക്ഷകള് 19നകം ബൂത്ത് ലെവല് ഓഫീസര്ക്ക് നല്കണം.
അസന്നിഹിത വോട്ടര് (ആബ്സെന്റീ വോട്ടര്) വിഭാഗത്തില്പ്പെടുത്തിയാണ് 85 വയസു പിന്നിട്ടവര്ക്കും 40 ശതമാനത്തിലേറെ ഭിന്നശേഷിയുള്ളവര്ക്കും വീട്ടില് തന്നെ വോട്ട് ചെയ്യുന്നതിനുള്ള സൗകര്യം തെരഞ്ഞെടുപ്പു കമ്മീഷന് ഒരുക്കിയിരിക്കുന്നത്.
ഉപവരണാധികാരികള് തയാറാക്കിയ സമയക്രമപ്രകാരം വോട്ട് രേഖപ്പെടുത്തേണ്ട തീയതി വോട്ടര്മാരെ മുന്കൂട്ടി അറിയിക്കും. പ്രസ്തുത പട്ടിക സ്ഥാനാര്ഥികള്ക്കും ബന്ധപ്പെട്ട ബൂത്ത് ലെവല് ഓഫീസര്മാര്ക്കും മുന്കൂറായി ലഭ്യമാക്കും. രണ്ടു പോളിംഗ് ഉദ്യോഗസ്ഥര്, ഒരു മൈക്രോ ഒബ്സര്വര്, വീഡിയോഗ്രഫര്, ഒരു സുരക്ഷാഉദ്യോഗസ്ഥന് എന്നിവരടങ്ങുന്ന സംഘമായിരിക്കും വോട്ടു രേഖപ്പെടുത്താനായി താമസസ്ഥലത്ത് എത്തുക.
വോട്ടിംഗിന്റെ രഹസ്യസ്വഭാവം നിലനിര്ത്തി വോട്ട് ചെയ്യാനുള്ള സൗകര്യങ്ങളും പോളിംഗ് സംഘം ഒരുക്കും. അസന്നിഹിത വോട്ടുകള് രേഖപ്പെടുത്തിയ പോസ്റ്റല് ബാലറ്റുകള് ഉപവരണാധികാരികള് അതതു ദിവസം വരണാധികാരി ചുമതലപ്പെടുത്തിയ പോസ്റ്റല് ബാലറ്റ് നോഡല് ഓഫീസറെ ഏല്പ്പിച്ച് വോട്ടെണ്ണല് ദിവസം വരെ ജില്ലാ ട്രഷറിയില് സൂക്ഷിക്കും.
