മൂന്നാര്: കാലാവസ്ഥയില് അടിക്കടിയുണ്ടാകുന്ന വ്യതിയാനങ്ങള് മൂന്നാറിലെ ടൂറിസം മേഖലയ്ക്ക് തിരിച്ചടിയാകുന്നു. കഴിഞ്ഞദിവസം ആള്ട്രാ വയലറ്റിന്റെ വികിരണം ഉയര്ന്ന തോതില് രേഖപ്പെടുത്തിയത് മൂന്നാറിലായിരുന്നു. എട്ടു ഡിഗ്രിയായിരുന്നു കഴിഞ്ഞദിവസത്തെ അളവ്. വികിരണത്തോത് വര്ധിച്ചതോടെ ഇവിടെ ഓറഞ്ച് അലര്ട്ട പ്രഖ്യാപിച്ചിരുന്നു. തൊട്ടുമുമ്പുള്ള ദിവസം ഏഴു ഡിഗ്രിയായിരുന്നു വികിരണത്തോത്. അന്ന് യെല്ലോ അലര്ട്ടാണ് പ്രഖ്യാപിച്ചിരുന്നത്.
പകല് 11 മുതല് ഉച്ചകഴിഞ്ഞ് മൂന്നുവരെ നേരിട്ടുള്ള വെയില് ഏല്ക്കുന്നതില് ജാഗ്രത പുലര്ത്തണമെന്ന അറിയിപ്പ് വിനോദസഞ്ചാര കേന്ദ്രങ്ങൾക്ക് പ്രതിസന്ധിയാണ്. ഈ സമയങ്ങളിലാണ് വിനോദസഞ്ചാര കേന്ദ്രങ്ങള് സന്ദര്ശിക്കാന് സന്ദര്ശകര് പ്രധാനമായും എത്തുന്നത്. അലര്ട്ട് ഉള്ളയിടങ്ങളില് ക്യത്യമായ മുന്കരുതലോടെ മാത്രമേ പുറത്തിറങ്ങാവൂ എന്നുള്ള നിര്ദേശമുള്ളതിനാല് ഉദ്യോഗസ്ഥരും ജാഗ്രത തുടരുന്നുണ്ട്.
ഭൂമിയില്നിന്നു സൂര്യന് അകലുന്ന എഫിലിയോണ് പ്രതിഭാസം മൂന്നാറില് രാത്രി സമയത്ത് നല്ല തണുപ്പിനും കാരണമായിട്ടുണ്ട്. ഇതുമൂലം രാവിലെയും നല്ല തണുപ്പാണ് അനുഭവപ്പെടുന്നത്. അള്ട്രാ വയലറ്റ് വികിരണങ്ങളുടെ തോത് ഉയര്ന്നു നിന്നാൽ മൂന്നാറിലേക്കുള്ള സഞ്ചാരികളുടെ വരവ് കുറയാനാണ് സാധ്യത.
