കോഴിക്കോട്: വടകരയിൽ ദേശീയ പാതയിൽ വാഹനാപകടം. നാല് മരണം. വടകര മൂരാട് പാലത്തിന് സമീപം കാറും ട്രാവലർ വാനും കൂട്ടിയിടിച്ചാണ് അപകടം ഉണ്ടായത്. കാർ യാത്രക്കാരാണ് മരിച്ചത്. ഒരാൾക്ക് ഗുരുതരമായി പരിക്കേറ്റു.
കണ്ണൂർ ഭാഗത്തേക്ക് പോയ കാറും ഇതേ ദിശയിലേക്ക് പോയിരുന്ന കർണാടക രജിസ്‌ട്രേഷൻ ആണ് ടെംപോ ട്രാവലറുമാണ് അപകടത്തിൽപ്പെട്ടത്. മരിച്ചവരിൽ മുന്ന് സ്ത്രീകളും ഒരു പുരുഷനും ഉൾപ്പെടുന്നു. മാഹി പുന്നോൽ സ്വദേശികളായ റോജ, ജയവല്ലി, ഷിഗിൻ ലാൽ, രഞ്ജി എന്നിവരാണ് മരിച്ചത്. കാറിലുണ്ടായ മറ്റൊരു പുരുഷനാണ് ഗുരുതരമായി പരിക്കേറ്റ വ്യക്തി.
ദേശീയ പാതയുടെ പണി പൂർത്തിയായ ഭാഗത്താണ് അപകടം. പമ്പിൽ നിന്നും ഇന്ധനം നിറച്ച് ദേശീയ പാതയിലേക്ക് തിരിഞ്ഞ കാറിൽ വേഗത്തിലെത്തിയ ടെംപോ ട്രാവലർ ഇടിച്ചു കയറുകയറുകയായിരുന്നു.
ട്രാവലറിൽ സഞ്ചരിച്ച് എട്ട് പേർക്ക് പരിക്കേറ്റു. ഇവർ എല്ലാവരും വടകരയിലെ ആശുപത്രിയിൽ പ്രവേശിപ്പിച്ചു. അപകടത്തിപ്പെട്ട കാർ വെട്ടിപ്പൊളിച്ചാണ് ആളുകളെ പുറത്തെടുത്തത്.
