കോട്ടയ്ക്കല്: കോട്ടയ്ക്കലില് മൂന്നിടങ്ങളില്നിന്നായി രേഖകളില്ലാത്ത 28,73,700 രൂപ പോലീസ് പിടിച്ചെടുത്തു. ഇതുമായി ബന്ധപ്പെട്ട് താനൂര് വെള്ളച്ചാല് പേങ്ങാട്ട് ഷഫീഖ്(30), വലിയപറമ്പ് പുത്തൂര് ചാലിലകത്ത് നൗഷാദ് (42) എന്നിവരെ അറസ്റ്റുചെയ്തു.
വെള്ളിയാഴ്ച രാവിലെ കോട്ടയ്ക്കല് വലിയപറമ്പില് വെച്ച് ഓട്ടോറിക്ഷയില് നിന്നാണ് ഷഫീഖിനെ 19,52,700 രൂപയുമായി പിടികൂടിയത്. പിന്നീട് പിറകെ വന്ന സ്കൂട്ടര് യാത്രക്കാരനായ നൗഷാദിന്റെ പക്കല്നിന്നു 6,56 800 രൂപ പിടിച്ചു. ഇയാളുടെ വീട്ടില് സൂക്ഷിച്ചിരുന്ന 2,64,200 രൂപയും പിടിച്ചെടുത്തു.
പണം കോടതിയില് സമര്പ്പിച്ചതായും വിവരങ്ങള് എന്ഫോഴ്സ്മെന്റ് വിഭാഗത്തിനു കൈമാറിയതായും കോട്ടയ്ക്കല് സി.ഐ. വിനോദ് വലിയാട്ടൂര് പറഞ്ഞു. പണംവന്നത് ഖത്തറിലുള്ള ചില പ്രവാസികളില് നിന്നാണെന്നാണ് നിഗമനം.
വിനോദ് വലിയാട്ടൂരിനെക്കൂടാതെ എസ്ഐ സെയ്ഫുള്ള, എസ്സിപിഒമാരായ ജിതേഷ്, ബിജു, രാജേഷ്, ഷീജ എന്നിവര് പോലീസ് സംഘത്തിലുണ്ടായിരുന്നു.
