തിരുവനന്തപുരം: തിരുവനന്തപുരത്ത് കോണ്ഗ്രസിന്റെ മണ്ഡലം കമ്മിറ്റി ഓഫീസിന് തീവെച്ചു. നെയ്യാറ്റിന്കര, പാലിയോട് ജംഗ്ഷനിലെ ആനാവൂര് മണ്ഡലം കമ്മിറ്റിയുടെ ഓഫീസിന് നേരെയായിരുന്നു ആക്രമണം. ഓട് കൊണ്ടുള്ള പഴയ കെട്ടിടവും ഫ്ളക്സ് ബോര്ഡുകളും കത്തിനശിച്ചു. സംഭവത്തിന്റെ സിസിടിവി ദൃശ്യങ്ങള് റിപ്പോര്ട്ടറിന് ലഭിച്ചു.
രാത്രി പാര്ട്ടി ഓഫീസിന് പിന്നിലൂടെ എത്തിയ സംഘമാണ് ആക്രമണം നടത്തിയത്. കയ്യില് കരുതിയിരുന്ന ദ്രാവകം ഫ്ളക്സ് ബോര്ഡില് ഒഴിച്ച ശേഷം തീ കത്തിക്കുകയായിരുന്നു. മുന് മുഖ്യമന്ത്രി ഉമ്മന്ചാണ്ടിയുടെയും മുഖ്യമന്ത്രി വി ഡി സതീശന്റെയും ഫ്ളക്സുകള് പൂര്ണമായും കത്തി നശിച്ച നിലയിലാണ്.
നാട്ടുകാര് ഇടപെട്ട് തീ അണച്ചതിനാല് സമീപത്തുള്ള കെട്ടിടങ്ങളിലേക്ക് തീ പടര്ന്നില്ല. നാട്ടുകാരാണ് വിവരം പൊലീസില് അറിയിച്ചത്. കഴിഞ്ഞ ദിവസം ഇവിടെ ബിജെപി-യൂത്ത് കോണ്ഗ്രസ് പ്രവര്ത്തകര് തമ്മില് തര്ക്കമുണ്ടായതായി വിവരമുണ്ട്. ഇതിന്റെ തുടര്ച്ചയായുണ്ടായ ആക്രമണമാണോ എന്നതില് അന്വേഷണം നടക്കുന്നുണ്ട്. മാരായമുട്ടം പൊലീസാണ് അന്വേഷണം നടത്തുന്നത്.
