ചെന്നിത്തല: ആലപ്പുഴ ചെന്നിത്തല നവോദയ സ്കൂളിലെ പ്ലസ് വൺ വിദ്യാർത്ഥി അഭിഗീതിനെ ഹോസ്റ്റലിൽ മരിച്ച നിലയിൽ കണ്ടെത്തിയ സംഭവത്തിൽ ദുരൂഹത ആരോപിച്ച് കുടുംബം. തന്റെ മകൻ ഒരിക്കലും ആത്മഹത്യ ചെയ്യില്ലെന്നും ഇതൊരു കൊലപാതകമാണെന്നും പിതാവ് ആരോപിച്ചു. സംഭവത്തിൽ മാന്നാർ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു.
ചൊവ്വാഴ്ച ഉച്ചയ്ക്ക് ശേഷം കാണാതായ അഭിഗീതിനെ സ്കൂളിലെ ശുചിമുറിക്ക് സമീപമാണ് മരിച്ച നിലയിൽ കണ്ടെത്തിയത്. “I hate my life Ammu” എന്ന് ഇംഗ്ലീഷിൽ എഴുതിയ ഒരു കുറിപ്പ് പോലീസ് കണ്ടെടുത്തിട്ടുണ്ട്. ഇത് മരണം ആത്മഹത്യയാണെന്ന നിഗമനത്തിലേക്ക് പോലീസിനെ നയിക്കുന്നുണ്ടെങ്കിലും വ്യക്തിപരമായ കാരണങ്ങളാണോ അതോ മറ്റെന്തെങ്കിലുമാണോ എന്നതിൽ വ്യക്തതയില്ല. കഴിഞ്ഞ എട്ട് മാസത്തിനിടെ ഈ സ്കൂൾ ഹോസ്റ്റലിൽ നടക്കുന്ന രണ്ടാമത്തെ മരണമാണിത്.
പത്താം ക്ലാസ് വിദ്യാർത്ഥിനി എസ്. നേഹ ജീവനൊടുക്കിയ സംഭവത്തിൽ അന്വേഷണം തുടരുന്നതിനിടെയാണ് മറ്റൊരു മരണം കൂടി റിപ്പോർട്ട് ചെയ്യപ്പെടുന്നത്.
