തൊടുപുഴ : പൊതുമരാമത്ത് അധികൃതരുടെ അനാസ്ഥയില് യുവാവിന് ദാരുണാന്ത്യം. ബൈക്ക് നിയന്ത്രണം വിട്ട് റോഡരികിലെ കലുങ്കിന്റെ കുഴിയില് വീണ് യുവാവ് മരിച്ചു. തൊടുപുഴ മുതലക്കോടം സ്വദേശി കുന്നേല് ബെന്നിയുടെ മകന് ജെയ്സ് (27) ആണ് മരിച്ചത്.
നാളെ വിദേശത്തേക്കു ജോലിക്കായി തിരികെ പോകാനിരിക്കെയാണ് അപകടത്തില് മരണം സംഭവിച്ചത്. ഇന്നലെ രാത്രി 10.45 ഓടെ തൊടുപുഴ-ഉടുമ്പന്നൂര് റൂട്ടില് മുതലക്കോടത്തായിരുന്നു അപകടം. തൊടുപുഴ ഭാഗത്തേക്കു വരികയായിരുന്ന ജെയ്സിന്റെ ബൈക്ക് നിയന്ത്രണം വിട്ട് റോഡരുകില് കലുങ്കിനായി എടുത്തിട്ടിരുന്ന കുഴിയിലേക്കു വീഴുകയായിരുന്നു.
ഗുരുതരമായി പരുക്കേറ്റ ജെയ്സിനെ നാട്ടുകാര് ഉടന് തന്നെ മുതലക്കോടത്തെ സ്വകാര്യ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. മാള്ട്ടയില് ജോലിയില് ചെയ്തിരുന്ന ജെയ്സ് അവധിക്കു വന്ന ശേഷം നാളെ വീണ്ടും തിരികെ പോകാനിരിക്കെയാണ് മരണം. ബിന്ദുവാണ് മാതാവ്. അന്ന ഏക സഹോദരിയാണ്.
മൃതദേഹം ഇന്ന് തൊടുപുഴ ജില്ലാ ആശുപത്രിയില് പോസ്റ്റ്മോര്ട്ടത്തിന് ശേഷം ബന്ധുക്കള്ക്കു കൈമാറും. ഇതിനിടെ അപകടത്തിനു ശേഷം കടുത്ത എതിര്പ്പുമായി നാട്ടുകാര് രംഗത്തെത്തി. കലുങ്കിനായി എടുത്ത കുഴി മൂടാത്തതിനാലാണ് ജീവന് പൊലിയാനിടയാക്കിയതെന്ന് നാട്ടുകാര് പറഞ്ഞു.
കാലങ്ങളായി ഈ കുഴി മൂടാതെ കിടക്കുന്നതിനാല് നിരവധി അപകടങ്ങളാണ് ഇവിടെ നടന്നത്. പൊതുമരാമത്ത് അധികൃതരോട് നിരവധി തവണ ആവശ്യപ്പെട്ടിട്ടും നടപടിയുണ്ടായില്ലെന്ന് ഇവര് ചൂണ്ടിക്കാട്ടി.
