ന്യൂഡല്‍ഹി: ത്വരിതഗതിയില്‍ വളര്‍ച്ച കൈവരിക്കുന്ന വലിയ സമ്പദ്‌വ്യവസ്ഥയായി തുടര്‍ന്ന് ഇന്ത്യ. നടപ്പുസാമ്പത്തിക വര്‍ഷത്തില്‍ ഇന്ത്യന്‍ സമ്പദ്‌വ്യവസ്ഥ 6.3 ശതമാനം വളര്‍ച്ച രേഖപ്പെടുത്തുമെന്നാണ് പ്രതീക്ഷയെന്നും ഐക്യരാഷ്ട്ര സഭയുടെ ഏറ്റവും പുതിയ റിപ്പോര്‍ട്ടില്‍ പറയുന്നു. ആഗോള സമ്പദ്‌വ്യവസ്ഥ അപകടകരമായ മാന്ദ്യം അനുഭവിക്കുന്ന ഘട്ടത്തിലാണ് ഇന്ത്യയുടെ സാമ്പത്തിക വളര്‍ച്ചയെന്നത് ശ്രദ്ധേയമാണെന്നും യുഎന്‍ റിപ്പോര്‍ട്ടില്‍ സൂചിപ്പിച്ചിരിക്കുന്നു.
ശക്തമായ സ്വകാര്യ ഉപഭോഗത്തിലൂടേയും പൊതുനിക്ഷേപത്തിലൂടേയും ഏറ്റവും വേഗത്തില്‍ വളര്‍ച്ചയിലേക്ക് നീങ്ങുന്ന വലിയ സമ്പദ്‌വ്യവസ്ഥകളിലൊന്നായി ഇന്ത്യ തുടരുകയാണ്. 2025 ജനുവരിയില്‍ രേഖപ്പെടുത്തിയ 6.6 ശതമാനം വളര്‍ച്ചാനിരക്ക് 6.3 ശതമാനമായി കുറഞ്ഞിട്ടുണ്ടെങ്കിലും ഇന്ത്യയുടെ വളര്‍ച്ച ശ്രദ്ധേയമാണെന്ന് യുഎന്നിലെ മുതിര്‍ന്ന സാമ്പത്തികകാര്യ ഉദ്യോഗസ്ഥനായ ഇംഗോ പിറ്റേര്‍ലെ പറഞ്ഞു.
വേള്‍ഡ് ഇക്കണോമിക് സിറ്റുവേഷന്‍ ആന്‍ഡ് പ്രോസ്‌പെക്ട്‌സ് (ഡബ്ല്യുഇഎസ്പി) അര്‍ധവാര്‍ഷിക റിപ്പോര്‍ട്ട് പ്രകാരം അടുത്ത വര്‍ഷം ഇന്ത്യന്‍ സമ്പദ് വ്യവസ്ഥയുടെ പ്രതീക്ഷിക്കുന്ന വളര്‍ച്ചാനിരക്ക് 6.4 ശതമാനമായിരിക്കുമെന്നാണ്. വളര്‍ച്ചാനിരക്കില്‍ ജനുവരിയിലേതിനേക്കാള്‍ 0.3 ശതമാനം കുറവുണ്ടാകുമെങ്കിലും മികച്ച വളര്‍ച്ചാനിരക്ക് കൈവരിക്കുമെന്നാണ് റിപ്പോര്‍ട്ടില്‍.
ആഗോളസമ്പദ്‌വ്യവസ്ഥ അപകടകരമായ നിലയിലാണെന്നും റിപ്പോര്‍ട്ട് പറയുന്നു. വ്യാപാരപിരിമുറുക്കങ്ങളും വ്യാപാരനയത്തിലെ അനിശ്ചിതാവസ്ഥയും ആഗോളസമ്പദ്‌വ്യവസ്ഥയെ സാരമായി ബാധിച്ചിട്ടുണ്ടെന്ന് റിപ്പോര്‍ട്ട് പറയുന്നു. ആഗോളസമ്പദ്‌വ്യവസ്ഥ ഏറെ മോശമായ നിലയിലാണെന്ന് ഇക്കണോമിക് ആന്‍ഡ് പോളിസി ഡിവിഷന്‍ ഡയറക്ടര്‍ ശാന്തനു മുഖര്‍ജി ഡബ്ല്യുഇഎസ്പിയുടെ പ്രസിദ്ധീകരണവേളയില്‍ പറഞ്ഞു.
രണ്ടുവര്‍ഷത്തെ സുസ്ഥിരവളര്‍ച്ചയാണ് ആഗോളസമ്പദ്‌വ്യവസ്ഥയുടെ വിഷയത്തില്‍ ഇക്കൊല്ലം ജനുവരിയില്‍ പ്രതീക്ഷിച്ചതെന്നും എന്നാല്‍ മറിച്ചാണ് സംഭവിച്ചതെന്നും ശാന്തനു മുഖര്‍ജി കൂട്ടിച്ചേര്‍ത്തു. അതേസമയം ആഗോള വളര്‍ച്ചാനിരക്കായ 2.4 ശതമാനത്തില്‍ നിന്ന് ലോകത്തിലെ അഞ്ചാമത്തെ വലിയ സാമ്പത്തികശക്തിയായ ഇന്ത്യയുടെ വളര്‍ച്ചാനിരക്ക് വ്യത്യസ്തമായി തുടരുകയാണെന്നും ഡബ്ല്യുഇഎസ്പി റിപ്പോര്‍ട്ട് പറയുന്നു. ലോകത്തെ വലിയ സാമ്പത്തിക ശക്തികളില്‍ ചൈനയുടെ വളര്‍ച്ചാനിരക്ക് 4.6 ശതമാനവും യുഎസിന്റേത് 1.6 ശതമാനവും ജര്‍മനിയുടേത് -0.1 ശതമാനവും ജപ്പാന്റെ നിരക്ക് 0.7 ശതമാനവും യൂറോപ്യന്‍ യൂണിയന്റേത് ഒരുശതമാനമായിരിക്കുമെന്നും റിപ്പോര്‍ട്ട് പറയുന്നു.
സ്വകാര്യഉപഭോഗവും പൊതുനിക്ഷേപവും കയറ്റുമതിയും ഇന്ത്യയുടെ വളര്‍ച്ചയെ പിന്തുണയ്ക്കും. നാണയപ്പെരുപ്പം, തൊഴിലവസരം തുടങ്ങിയവയിലും ഇന്ത്യയ്ക്ക് അനുകൂലമായ പ്രവണതകള്‍ ഉണ്ടാകുമെന്നാണ് റിപ്പോര്‍ട്ട് പറയുന്നത്. 2024-ലെ നിരക്കായ 4.9 ശതമാനത്തില്‍നിന്ന് നാണയപ്പെരുപ്പനിരക്ക് 4.3 ശതമാനമായി കുറയും. തൊഴിലില്ലായ്മ നിരക്കില്‍ വര്‍ധനവുണ്ടാകില്ലെന്നും റിപ്പോര്‍ട്ട് സൂചിപ്പിക്കുന്നു.
ഇന്ത്യയുടെ സാമ്പത്തികവളര്‍ച്ചാനിരക്ക് 6.2 ശതമാനമായിരിക്കുമെന്നും അടുത്തകൊല്ലം 6.3 ശതമാനമായി വര്‍ധിക്കുമെന്നും ഏപ്രില്‍ മാസത്തില്‍ അന്താരാഷ്ട്ര നാണയനിധി പറഞ്ഞിരുന്നു.
