കുന്നംകുളം : നഗരത്തിൽ റോഡരികിൽ കൂടി കിടന്നിരുന്ന മാലിന്യങ്ങൾ നഗരസഭ നീക്കി. യേശുദാസ് റോഡിലെ ആക്രിക്കടക്ക് സമീപത്ത് കൂടി കിടന്നിരുന്ന മാലിന്യങ്ങളാണ് പൊതുജനാരോഗ്യ പരിസ്ഥിതി പരിപാലന വിഭാഗം ഉദ്യോഗസ്ഥര് നീക്കിയത്.
നഗരത്തിന്റെ വിവിധ ഇടങ്ങളിൽ ശുചീകരണ പ്രവർത്തനങ്ങൾ കൃത്യമായി നടത്തി മാലിന്യ കൂമ്പാരങ്ങൾ നീക്കം ചെയ്ത് പൂന്തോട്ടങ്ങൾ നിർമ്മിച്ചിരുന്നു. എന്നാല് യേശുദാസ് റോഡിലെ മാലിന്യങ്ങള് നീക്കം ചെയ്യാന് സാധിച്ചിരുന്നില്ല. മുഴുവൻ ശുചീകരണ തൊഴിലാളികളെ ഉള്പ്പെടുത്തിയാണ് ഒരു മണിക്കൂർ കൊണ്ട് മാലിന്യക്കൂമ്പാരം പൂർണ്ണമായി നീക്കം ചെയ്തത്.
നീക്കിയ മാലിന്യങ്ങൾ കുറുക്കന്പാറ ഗ്രീൻപാർക്കിൽ തരം തിരിച്ച് സംസ്കരിക്കും. നീക്കിയ മാലിന്യത്തില് നിന്ന് വില ലഭിക്കാവുന്ന പാഴ്വസ്തുക്കൾ ഹരിതകർമ്മസേനയുടെ സഹായത്തിൽ വിൽപ്പന നടത്തും. ഇതില് നിന്ന് ലഭിക്കുന്ന തുക യേശുദാസ് റോഡില് താമസിക്കുന്ന വൃദ്ധക്ക് നൽകുമെന്ന് പൊതുജനാരോഗ്യ പരിസ്ഥിതി പരിപാലന വിഭാഗം അറിയിച്ചു.
ക്ലീൻ സിറ്റി മാനേജർ ആറ്റ്ലി പി. ജോൺ, പി.എച്ച്.ഐ എ. രഞ്ജിത്ത്, എച്ച്.ഐ മാരായ എസ്. രശ്മി,എം. എസ്. ഷീബ, പി. പി. വിഷ്ണു,സിവിൽ പോലീസ് ഓഫീസർ വി. ജെ. ജിൻസി എന്നിവർ നേതൃത്വം നൽകി.
