പനങ്ങാട്: വിവിധ ക്ഷേത്രങ്ങളില് മോഷണം നടത്തിയ കേസില് രണ്ട് പേര് അറസ്റ്റില്. പനങ്ങാട് സ്വദേശികളായ സെബാന്പുരം പന്തേകാട്ടില് ഡാര്വിന് (22), മാനാട്ടില് ചര്ച്ച് റോഡില് ശ്യാമപ്രസാദ് (18) എന്നിവരെ പനങ്ങാട് പോലീസാണ് പിടികൂടിയത്.
നെട്ടൂര് കല്ലാത്ത് ക്ഷേത്രത്തില് കഴിഞ്ഞ 21ന് പൂജ സാധനങ്ങളും മറ്റും മോഷണം പോയിരുന്നു. ഇതുമായി ബന്ധപ്പെട്ട് നടത്തിയ അന്വേഷണത്തിനിടെയാണ് പ്രതികള് പിടിയിലായത്. ചേപ്പനം, പനങ്ങാട് പ്രദേശങ്ങളിലെ ക്ഷേത്രങ്ങളില് ഭണ്ഡാര മോഷണം വ്യാപകമായിരുന്നു. ഭണ്ഡാരം കുത്തിത്തുറന്ന് കറന്സി നോട്ടുകളാണ് പ്രധാനമായും കവര്ന്നിരുന്നത്.
ചേപ്പനം പാട്ടുപറമ്പില് ക്ഷേത്രത്തിലെ ഭണ്ഡാരം കഴിഞ്ഞ 17 ന് രാവിലെയാണ് കുത്തിത്തുറന്ന നിലയില് കണ്ടത്.ഒരു മാസത്തെ പണം ഏകദേശം 4,000 രൂപയോളം ഉണ്ടായിരുന്നു. പനങ്ങാട് കാമോത്ത് ഭഗവതി ക്ഷേത്രത്തില് രണ്ട് ആഴ്ചയ്ക്കിടെ രണ്ട് തവണയാണ് ഭണ്ഡാരം കുത്തിത്തുറന്ന നിലയില് കണ്ടത്.
ചേപ്പനം കോതേശ്വരം മഹാദേവ ക്ഷേത്രത്തിനു പുറത്തും ഭദ്രകാളി സന്നിധിയിലും സ്ഥാപിച്ചിരുന്ന ഭണ്ഡാരങ്ങള് കഴിഞ്ഞ 14ന് കുത്തിത്തുറന്നു പണം കവര്ന്നിരുന്നു. പോലീസെത്തി പരിശോധന നടത്തി വരികയായിരുന്നു. ഈ കേസുകളിലും ഇവരാണ് പ്രതികളെന്ന് പോലീസ് പറഞ്ഞു.
