ശബരിമല: ചിങ്ങമാസപൂജയ്ക്ക് നട തുറന്ന ദിവസമായ ശനിയാഴ്ച വൈകീട്ട് ചെരിപ്പിട്ട് സോപാനത്തിന് സമീപം എത്തിയ പോലീസുകാരനെ ഡ്യൂട്ടിയില്‍നിന്ന് ഒഴിവാക്കി. തിരുവനന്തപുരം എസ്എപി ക്യാമ്പിലെ സിവില്‍ പോലീസ് ഓഫീസര്‍ രാജേഷിനെയാണ് ക്യാമ്പിലേക്ക് തിരിച്ചയച്ചത്.
ശനിയാഴ്ച രാത്രി 8.45-നാണ് സംഭവം. വെളുത്ത ചെരിപ്പിട്ട് സോപാനത്തിന് സമീപം നില്‍ക്കുന്നത് ശ്രദ്ധയില്‍പ്പെട്ട അയ്യപ്പഭക്തരില്‍ ഒരാള്‍ മൊബൈല്‍ ഫോണില്‍ ചിത്രം എടുത്തതോടെയാണ് വിവരം പുറത്തറിഞ്ഞത്. മഴ പെയ്തുകിടന്നതിനാല്‍ ചെരിപ്പുമായി ഓടി സന്നിധാനത്തേക്ക് കയറുകയായിരുന്നെന്നും, ചെരിപ്പ് അഴിച്ചുമാറ്റാന്‍ മറന്നുപോയെന്നുമാണ് പോലീസുകാരന്റെ വിശദീകരണം.
അറിയാതെ പറ്റിയതാണെങ്കിലും പോലീസ് ഈ വിഷയം ഗൗരവത്തിലെടുത്തിട്ടുണ്ട്. അച്ചടക്കലംഘനമായി കണക്കാക്കി അന്വേഷണത്തിന് ശബരിമല പോലീസ് ചീഫ് കോ-ഓര്‍ഡിനേറ്ററായ എഡിജിപി എസ്. ശ്രീജിത്ത് ഉത്തരവിട്ടു. വടക്കേനട വഴിയാണ് പോലീസുകാരന്‍ കയറിയത്.
