ഡൽഹി: കേന്ദ്ര ധനമന്ത്രി നിർമല സീതാരാമനുമായി മുഖ്യമന്ത്രി പിണറായി വിജയന്റെ കൂടിക്കാഴ്ച ഇന്ന്. ഡൽഹി കേരള ഹൗസിൽ രാവിലെ 9 മണിക്കാണ് കൂടിക്കാഴ്ച. കേരളത്തിന്റെ വികസന മേഖലകളിൽ മെച്ചപ്പെട്ട സഹായം നൽകുന്ന കാര്യത്തിൽ മുഖ്യമന്ത്രിയുമായി സംസാരിച്ച് തീരുമാനമെടുക്കുമെന്ന് നിർമലാ സീതാരാമൻ അറിയിച്ചിരുന്നു. ഡൽഹിയിലെ കേരളത്തിന്റെ പ്രത്യേക പ്രതിനിധി പ്രൊഫ. കെ.വി. തോമസുമായുള്ള ചർച്ചയിലാണ് ഇക്കാര്യം അറിയിച്ചത്.
മുണ്ടക്കൈ-ചൂരൽമല ദുരന്തത്തിൽ സഹായം ഇതുവരെ പൂർണമായി ലഭിച്ചിട്ടില്ലെന്ന് കെ.വി. തോമസ് മന്ത്രിയെ അറിയിച്ചു.525 കോടി രൂപയുടെ കടസഹായം മാർച്ച് 31-മുൻപ്‌ പൂർണമായി ചെലഴിക്കാൻ സാധിക്കാത്ത സാഹചര്യത്തിൽ പ്രത്യേക പരിഗണന ഈ തുക ചെലവഴിക്കുന്ന കാര്യത്തിൽ ഉണ്ടാവണമെന്നും അദ്ദേഹം ആവശ്യപ്പെട്ടു.
വിഴിഞ്ഞം പദ്ധതിക്കുള്ള കേന്ദ്രസാമ്പത്തിക സഹായം ലഭ്യമാക്കുന്നതിന് ചർച്ച നടക്കുകയാണെന്ന് ധനമന്ത്രി അറിയിച്ചു. കേരളത്തിന് അതിവേഗ റയിൽവേ സംവിധാനം നടപ്പാക്കുന്നതിന് ഇ. ശ്രീധരൻ നൽകിയിട്ടുള്ള പദ്ധതികൾ പരിശോധിച്ച് നടപടികളെടുക്കുമെന്നും മന്ത്രി ഉറപ്പുനൽകി.
