തിരുവനന്തപുരം: കിഫ്ബിക്ക് കടിഞ്ഞാണിടാനുള്ള സംസ്ഥാന സര്‍ക്കാര്‍ തീരുമാനത്തിനെതിരെ ശക്തമായ വിമര്‍ശനവുമായി പിണറായി വിജയന്‍. കേരളത്തിന്റെ വികസന സ്വപ്നങ്ങള്‍ക്ക് ചിറകുനല്‍കിയ കിഫ്ബിയെ തകര്‍ക്കാനുള്ള കേന്ദ്ര അജണ്ടയ്ക്ക് കുടപിടിക്കുകയാണ് യുഡിഎഫ് സര്‍ക്കാരെന്ന് പിണറായി വിജയന്‍ ആരോപിച്ചു. കിഫ്ബിക്കെതിരെ നിയോഗിച്ച സുധാ പിള്ള കമ്മിറ്റി റിപ്പോര്‍ട്ടും അതിനെ മഹത്വവല്‍ക്കരിക്കുന്ന മുഖ്യമന്ത്രിയുടെ നിലപാടും കേരളത്തോടുള്ള യുദ്ധപ്രഖ്യാപനമാണ്. മുഖ്യമന്ത്രി പറഞ്ഞുകൊണ്ടിരുന്ന ആരോപണങ്ങള്‍ അതേപടി പകര്‍ത്തിയെഴുതിയ വെറുമൊരു രാഷ്ട്രീയരേഖ മാത്രമാണ് നിയമസഭയുടെ മേശപ്പുറത്തുവെച്ച റിപ്പോര്‍ട്ടെന്നും പിണറായി വിജയന്‍ ഫേസ്ബുക്കില്‍ കുറിച്ചു.
ഇരുപത്തഞ്ചോ അമ്പതോ വര്‍ഷം കൊണ്ടുമാത്രം നടക്കാനിടയുള്ള അടിസ്ഥാന സൗകര്യവികസനങ്ങള്‍ ഇപ്പോള്‍ത്തന്നെ യാഥാര്‍ഥ്യമാക്കുക എന്ന ലക്ഷ്യമാണ് എല്‍ഡിഎഫ് സര്‍ക്കാര്‍ കിഫ്ബി വഴി സാധ്യമാക്കിയത്. കിഫ്ബിയെ പുനരുജ്ജീവിപ്പിച്ച ഘട്ടത്തില്‍ അതിനെ ഏറ്റവും രൂക്ഷമായി പരിഹസിച്ചവരാണിപ്പോള്‍ അതിന്റെ അവിശ്വസനീയമായ വിജയം കണ്ട് കണ്ണുമഞ്ഞളിച്ച് അതിനെ ഞെക്കിക്കൊല്ലാന്‍ ശ്രമിക്കുന്നതെന്നും പിണറായി ആരോപിച്ചു. കിഫ്ബിയെ തകര്‍ക്കുക എന്നത് ഒരു മണ്ടത്തരം മാത്രമല്ല, ഇന്നത്തെയും നാളത്തെയും തലമുറകളോട് ചെയ്യുന്ന കൊടും ക്രൂരത കൂടിയാണ്. ഭാവി വരുമാനത്തെ ഉറപ്പാക്കി ഒരു ലക്ഷം കോടിയോളം രൂപയുടെ പദ്ധതികള്‍ക്കാണ് കിഫ്ബി അനുമതി നല്‍കിയത്. സ്‌കൂളുകളും ആശുപത്രികളും പാലങ്ങളും ഉള്‍പ്പെടെ 40,000 കോടി രൂപയുടെ വികസന പ്രവര്‍ത്തനങ്ങള്‍ ഇതിനകം പൂര്‍ത്തിയായിക്കഴിഞ്ഞു. പ്ലാന്‍ ഫണ്ടിന് പുറമേയുള്ള ഈ ബജറ്റിതര വിഭവസമാഹരണമാണ് കേരളത്തിന്റെ മുഖച്ഛായ മാറ്റിയത്. പിണറായി പറഞ്ഞു.
