ബിജെപി കൊടികൾ വാങ്ങിയെന്ന പേരിൽ വ്യാജ ബില്ലുകൾ സമർപ്പിച്ചതിൽ പൊലീസിൽ പരാതി നൽകി സ്ഥാപന ഉടമ. വാമനപുരം കണിച്ചോട് ഭാഗത്തെ ബിജെപി പ്രാദേശിക നേതാവിന്റെ പലചരക്ക് കടയുടെ ബില്ലുകൾ ഉപയോഗിച്ചായിരുന്നു തട്ടിപ്പ് നടത്തിയത്. തിരുവനന്തപുരം കണിച്ചോടുള്ള എ.എ. ഏജൻസീസ് സ്ഥാപന ഉടമയാണ് പരാതിക്കാരൻ. കഴിഞ്ഞ നാല് വർഷമായി കമ്പ്യൂട്ടർ ബില്ല് ഉപയോഗിക്കുന്നില്ലെന്നാണ് പരാതിക്കാരൻ പറയുന്നത്.
വ്യാജ ബില്ലുണ്ടാക്കിയവരെ കണ്ടെത്തണം എന്നാണ് ആവശ്യം. കടയിൽ കൊടികൾ വിൽക്കാറില്ലെന്ന് കടയുടമ പറഞ്ഞിരുന്നു. പാർട്ടി കൊടിയും ചിഹ്നവും വിതരണം ചെയ്തത് മുതൽ സോഷ്യൽ മീഡിയ പ്രചാരണം വരെയുളള കാര്യങ്ങളിൽ ക്രമക്കേട് നടത്തി നേതാക്കൾ കോടികൾ തട്ടിയെടുത്തതായി ബിജെപി കേന്ദ്ര നേതൃത്വം ചുമതലപ്പെടുത്തിയ ഓഡിറ്റിങ് സംഘം കണ്ടെത്തിയിരുന്നു.
