നിയമവിരുദ്ധമായ രൂപമാറ്റങ്ങളും സുരക്ഷാ മാനദണ്ഡങ്ങളുടെ ലംഘനവും നടത്തി റോഡിലിറങ്ങിയ ടൂറിസ്റ്റ് ബസുകൾക്കെതിരെ മോട്ടോർ വാഹന വകുപ്പ് (എംവിഡി) കടുത്ത നടപടിയുമായി മുന്നോട്ട്. ഹൈക്കോടതിയുടെ കർശന നിർദ്ദേശത്തെ തുടർന്ന് നടത്തിയ പ്രത്യേക പരിശോധനയിൽ 15-ഓളം ടൂറിസ്റ്റ് ബസുകൾ എൻഫോഴ്സ്മെന്റ് വിഭാഗം പിടികൂടി.
കണ്ണിനെ ചുവപ്പിക്കുന്നതും മറ്റു ഡ്രൈവർമാർക്ക് കാഴ്ച തടസ്സമുണ്ടാക്കുന്നതുമായ ലേസർ ലൈറ്റുകൾ, അനുവദനീയ പരിധിക്ക് മുകളിലുള്ള ഹൈ-ഫ്രീക്വൻസി ഓഡിയോ സിസ്റ്റങ്ങൾ എന്നിവ ഘടിപ്പിച്ച വാഹനങ്ങളാണ് പ്രധാനമായി വലയിലായത്. ട്രാൻസ്പോർട്ട് കമ്മീഷണറുടെ നിർദ്ദേശത്തെ തുടർന്ന് എറണാകുളം എൻഫോഴ്സ്മെന്റ് ആർ.ടി.ഒ ബിജു ഐസക്കിന്റെ നേതൃത്വത്തിലുള്ള പ്രത്യേക സ്ക്വാഡുകളാണ് പരിശോധന നടത്തിയത്.
ഓരോ നിയമവിരുദ്ധ മാറ്റത്തിനും 5,000 രൂപ വീതം പിഴ ചുമത്തുകയും, രൂപമാറ്റങ്ങൾ നീക്കം ചെയ്ത് വീണ്ടും പരിശോധനയ്ക്ക് ഹാജരാക്കി അനുമതി ലഭിക്കും വരെ ബസുകളുടെ സർവീസ് പൂര്ണമായി നിരോധിക്കുകയും ചെയ്തു. ഗുരുതരമായ നിയമലംഘനങ്ങൾ കണ്ടെത്തിയ വാഹനങ്ങളുടെ ഫിറ്റ്നസ് സർട്ടിഫിക്കറ്റ് റദ്ദാക്കാനും നിർദ്ദേശം നൽകിയിട്ടുണ്ട്.
ചലിച്ചുകൊണ്ടിരിക്കുന്ന വാഹനങ്ങളിൽ ഡ്രൈവർ ക്യാബിനിൽ നിന്ന് വ്ലോഗ് ചിത്രീകരണം നടത്തുന്നത്, അപകടകരമായ ലേസർ ലൈറ്റുകൾ ഉപയോഗിക്കുന്നത് എന്നിവയ്ക്കെതിരെ നടപടിയെടുക്കാൻ ഹൈക്കോടതി മുമ്പ് തന്നെ ഉത്തരവിട്ടിരുന്നു. യാത്രാ സുരക്ഷ ഉറപ്പാക്കുന്നതിനായുള്ള നടപടികളാണ് ഇപ്പോൾ ശക്തിപ്പെടുത്തിയിരിക്കുന്നത്.
